CORRELINGUA 2020

SUSPENSIÓN FESTA FINAL 15 DE MAIO

A organización comunicou a suspensión das festas finais do Correlingua 2020, entre elas a da Coruña, o vindeiro 15 de maio, para a que estaban inscritos alumnos e alumnas  de 3º de ESO do noso centro.

Consideran a posibilidade de organizar algunhas actividades alternativas, de ser posíbel.
............

A realidade excepcional que nos está tocando vivir fai necesario adiar moitas actividades. O máis importante é que tod@s poidamos recuperar a nosa vida normal canto antes.

Ánimo e saúde a toda a comunidade educactiva.
EDLG.

PROGRAMA VISITAS E SAÍDAS "COÑECER GALICIA"

2º ESO. LUGO, CIDADE CASTREXA E CIDADE ROMANA

A visita a Lugo para o alumnado de 2º de ESO programada para o luns 16 de marzode 2020 foi adiada polas circunstancias excepcionais do confinamento pola crise sanitaria do coronavirus.
Agardamos poder levala a cabo en datas non moi lonxanas.


(Evidentemente, as aportacións do alumnado para aboar o custo dos transporte serán devoltas, en caso contrario).

PROGRAMA VISITAS E SAÍDAS "COÑECER GALICIA"

1º ESO. RUTA COSTA DA MORTE

Repetindo a exitosa experiencia do curso anterior con grupos de 1º de ESO, este curso  o luns 9 de marzo os grupos de 1º visitaron os escenarios do libro de lectura "Volverás golfiño" da escritora coruñesa Andrea Maceiras, que nos visitou para explicar a súa obra o pasado luns 2 de marzo (como aparece en entrada anterior deste blog).

Eses escenarios da Costa da Morte, recreados na obra, e a historia real e a ficticia narrada na novela, son dun grande valor en moitos aspectos distintos e deben ser coñecidos e valorados como tal polo alumnado.

Ademáis, este curso introducimos unha variación para acercar ao alumnado ao coñecemento da zona, con parada nos Muíños e Batáns do Mosquetín, na beira do río Grande. O enorme valor etnográfico desta visita supón un acercamento á historia pasada non tan lonxana do noso país.

Aínda que, como no ano anterior, a parada para a comida na praia de Ariño, no marabilloso entorno natural e nas cómodas instalacións da mesma, supón un dos momentos da visita que o noso alumnado máis valora e recorda.

Agradecemos a enorme colaboración do profesorado titor e acompañante á actividade, especialmente á coordinadora de ESO Mª Jesús Quintás e ao profesor-guía Antonio Fondo, do departamento de Relixión Católica. 

VISITA  ESCRITORA ANDREA MACEIRAS. 

LUNS 2 DE MARZO.

O departamento de Lingua galega e Literatura invitou á escritora Andrea Maceiras a visitar o nos centro e falar acerca das súas obras.

A tarde do luns 2 de marzo, ao longo de dúas sesións, falou de dúas das súas obras que figuran como libros de lectura obrigatorios para os grupos de 1º de ESO, Volverás golfiño,  e 3º de ESO,  Europa Express.

Interés especial para o alumndo de 1º de ESO que o vindeiro luns 9 de marzo ten programada polo departamento de EDLG a visita aos escenarios da primeira das obras.

A xove escritora coruñesa, que é tamén profesora de lingua de secundaria, explicou algúns aspectos de moito interese de ambas obras e atendeu ás preguntas  que o alumnado  lle presentou.

Tamén adicou e asinou a cant@s quixeron a súa obra.

Ao tempo, a coordinadora do EDLG, que tivo a sorte de lle dar clase cando era alumna de ESO e Bacharelato,  aproveita para animar a aqueles alumnos e alumnas con inquietude e interese pola creación literaria a que continúen cos seus esforzos, porque talento e traballo unidos dan froito.

Así o demostra o caso de Andrea, entre outros.

Con afecto e orgullo, á encantadora alumna que foi e á encantadora muller-escritora que é, grazas Andrea!

ENTROIDO 2020

E volveu o Entroido!!!!!
Como o celebramos?
Con:
- Disfraces.
- Festival.
- Lambetadas.

O alumnado de ESO organizou en cada clase un grupo e unha pequena actuación para o festival. Algúns con canción propia para esta ocasión...
Na Aula Picasso, como é habitual, desfilaron, presentados e animados pola profesora  Noemí , un tras outro e ofreceron ao resto dos seus compañeiros a festiva actuación que, baixo a coordinación e ás veces inspiración dos sacrificados titores e titoras, nos levou a cantar e bailar e aplaudir...

Os grupos que recibiron os premios deste ano foron:

A) Categoría 1º e 2º ESO: 1ºA  e 2º B

B) Categoría 3º e  4º ESO: 3ºD e 4º C

Tamén houbo o concurso de lambetadas, e os premios recaeron en:

1º premio: Carlota López Entrambasaguas.- 1º ESO A

Tamén foron premiados:

Nicolás John Barlow Zas.- 2º B
Carla López Riveros.- 2º ESO B
Ainara Suárez Ochoa.- 1º ESO C
Pablo Ymia Fernández e Ramón Sarmiento Fernandes.- 4º ESO A
Iria Sánchez Losada.- 3º ESO D

70 ANIVERSARIO PASAMENTO CASTELAO

Con motivo do 70 aniversario do pasamento do xenial debuxante e escritor Afonso Daniel  Rodríguez Castelao, o Departamento de Lingua e Literatura Galega, en colaboración co EDLG, levou a cabo unha exposición de materiais relacionados coa figura do insigne persoeiro.

A exposición dos materiais, como se pode observar nos documentos gráficos, recolle tanto a súa importantísima obra gráfica, como referencias á súa vida e importancia no ámbito social, cultural e político na súa época.

Moitos dos documentos que aparecen na exposición proceden de aportacións do profesorado do departamento e algúns dos propios fondos do centro.

Outra parte dos traballos expostos en relación coa figura de Castelao son os elaborados polo alumnado de 2º de ESO, baixo a dirección do profesorado do departamento.

Profesorado, alumnado, visitantes e resto do persoal desfrutan desde fins de xaneiro dos magníficos debuxos cos que Castelao explica os difíciles anos que se vivían na Galicia do momento, testemuña e denuncia de diferentes situacións nas que os máis débiles e  non tiñan outra voz. 

Tamén, de prensa da época, coas noticias encol da figura de Castelao...incluso a referencia ao seu pasamento en Bos Aires, carteis, libros, ...

Información acerca da súa figura e mostras da súa arte suscitan a atención detida de tod@s nós.

Castelao: unha figura que segue a ser un facho  aceso para a nosa cultura.

O NADAL

Coa colaboración da coordinadora de ESO e titores e titoras dos diferentes grupos, os grupos de ESO fixeron carteis para a celebración previa ás vacacións de Nadal.

Bo Nadal desexa  EDLG do centro a toda a Comunidade Educativa e Feliz e venturoso 2020.

Ata a volta!!!

ROSALÍA, UNHA ESTRELA

CELEBRACIÓN DO DÍA DA CIENCIA EN GALEGO

Seguindo coa  exitosa actividade desenvolvida o curso anterior polo departamento de Física e Química, coa elaboración da táboa dos elementos químicos periódicos en galego  por parte de diferentes cursos, os traballos dos mesmos serán  expostos ao longo e ancho das cortizas dos corredores do centro, desde fins de novembro ata comezos de febreiro de 2020, segundo as diferentes clases.

A cargo da profesora Mª Dolores Blanco. Novembro 2019.

MAGOSTO 2019

O venres 15 de novembro, a pesar do reto que supuxo conseguir ter listo un espazo viable para levar a cabo a festa, por mor desas obras que van a mellorar o acondicionamento do instituto, pero que parecen non ter fin, e coa gran implicación da dirección do Centro, o Equipo de Dinamización da Lingua Galega puido organizar o MAGOSTO 2019.

Novamente os castañeiros nos ofreceron as castañas asadas que son o elemento indispensable da festa.

Degustamos a saborosíiiisimas castañas, en abundancia. Compartimos o rato de lecer cos compañeiros e compañeiras, coa ilusión dese comezo festivo do outono.

Ademáis, e igualmente importante para o desfrute de todos, contamos con varios grupos de alumnos e alumnas que nos ofreceron os bailes tradicionais galegos e a música ancestral coa que nos acompañamos en todas aquelas ocasións nas que celebramos as nosas festas, as que herdamos dos nosos antepasados, nas que continuamos a recoñecernos.

Importantísimo resaltar a implicación deses alumnos e alumnas que ensaiaron desde comezo de curso para que puideramos gozar coas súas actuacións. Un grupo de alumnas de 1º de bacharelato, xa experimentadas, repetiron a súa desinteresada colaboración do curso anterior; outro grupo de alumnos e alumnas de 1º de ESO, 2º de ESO...comezaron este curso amosándonos a súa arte.

Grazas a todos e todas pola súa colaboración.

Grazas  tamén ao profesorado colaborador,especialmente os titores e titoras,  á dirección pola implicación e á AMPA, pola colaboración económica.

Parece que todos o pasamos ben, á vista das imaxes.
Ata o ano!!!!

"UNIVERSO CORUÑENTO" DE XURXO SOUTO. ÁGORA.

O mércores 13 de novembro de 2019, ao abeiro das actividades ofertadas polo Concello da Coruña para o alumnado de secundaria do presente curso escolar 2019-2020, departamento de Normalización Lingüística, asistimos  ao Auditorio do Centro Ágora, para participar no espectáculo "UNIVERSO CORUÑENTO", DE XURXO SOUTO.

As catro clases de 4º de ESO acudiron, acompañadas de seis profesores, ao espectáculo de imaxes, palabra e música, no que o cantante, escritor, profesor, divulgador...e moitas máis cousas, Xurxo Souto nos fixo reflexionar acerca do noso coñecemento da nosa cidade, proporcionándonos algúns datos   e historias descoñecidos por moitos ,e outros pola case totalidade dos asistentes participantes.

Compartimos con outros institutos de secundaria a experiencia, e tras aprender e cantar e berrar, regresamos ao centro sen novidade (e sen mollarnos), e coa conciencia de que nos faltan por coñecer moitas historias do noso entorno máis cercano, e que moitos nomes  antigos vencellados a diferentes lugares da cidade están en perigo de desaparición e, con eles, a nosa historia, que é unha parte importante do que somos hoxe: CORUÑESES /CORUÑENTOS.

Velaí unhas fotos do grupo no exterior.


Tamén a unidade didáctica da actividade, de grande interese.

SAMAÍN  2019

Celebramos, outro ano, a festa do Samaín no Eusebio.

Algúns din que é unha festa importada de América e outros refiren antigas celebracións comúns a Galicia e outras nacións  poboadas polos celtas en épocas moi lonxanas, que se foron pasando de lugar en lugar. Importa?

Nós decidimos celebrar a festa dos mortos coas decoracións DE MEDOOOOO!!! das portas das aulas. Este ano, con especial coidado para non manchar ou deteriorar todo aquilo que se está a arranxar no centro.

Tamén por mor das obras, a decoración soamente será nas aulas de 1º a 3º de ESO.

A aula gañadora recibirá UN CALDEIRO DE CHUCHES de premio.

................

A celebración resultou un verdadeiro éxito.

Cada vez máis conseguidas as decoracións, máis elementos en xogo, incluso pequenas representacións de grupos de alumnado.

O nivel de participación, altíiiiisimo. 

Parabéns a todos os participantes.

Vede as portas decoradas:

E parabéns especialmente aos grupos gañadores: 2º ESO V e 3º ESO D.

Recibiron tamén accésit un grupo de 1º de ESO  e un grupo de 2º de ESO

Benvida ao curso 2019-2020

CURSO 2019-2020

O Equipo de Dinamización da Lingua Galega do IES Plurilingüe Eusebio da Guarda quere  dar a benvida a toda a comunidade educativa e invitar a todos e todas a participar nos labores do equipo. Agardamos que moitos/as  se sumen ao grupo este ano e que as actividades resulten de interese, disfrute e proveito.

Bo curso!